Futuros xornalistas

Ollos curiosos, escintilantes, apaixonados con mirar, con velo todo e poder contalo.

Fuciños á procura do cheiro da actualidade, uliscando as novas.

Linguas bulideiras que queren comunicar, contar, informar e que non son quen de calar.

Orellas parabólicas que non perden detalle do que se di, do que se murmura, do que se oe.

Peles novas que desexa curtirse na procura de historias que merezan a pena ser contadas.

Cacholas ben espertas e sempre á espreita de todo aquilo que acontece ou poida acontecer.

Runs runs de corpos que non para, que procuran novas experiencias, novos saberes, novas aventuras...

Homes e mulleres orquestra que tentan sabelo todo e entendelo todo para tentar que os demais o saiban e o entendan empregando diversas ferramentas: letras, palabras, sons, silencios, ruídos, imaxes...

Persoas dispostas a non deixar de aprender ao longo de toda a súa vida.

En definitiva: comunicadores polivalentes, informadores, xornalistas.

(Dedicado a tódolos meus compañeiros do Máster en Edición Periodística da Escola de Medios de La Voz de Galicia 2006-2007).

servido por a-estela 2 comentarios compártelo